އަހަރު ދެބައިވިއިރު މަސް އެކްސްޕޯޓް ކޮށްގެން ލިބުނު އާމްދަނީ 43 އިންސައްތަ އިތުރުވެފައިވާ ކަމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭއިން އާންމުކޮށްފައިވާ ޖޫން މަހުގެ ތަފާސްހިސާބުތަކުން ދައްކައިފިއެވެ.

އެމްއެމްއޭގެ ހިސާބުތަކުން ދައްކާގޮތުން ރާއްޖެއިން އެކްސްޕޯޓް ކުރާ މުދަލުގެ އެންމެ ބޮޑު ބައެއް ހިއްސާ ކުރަނީ މަހާއި މަހުގެ އުފެއްދުންތަކެވެ. އެގޮތުން ވޭތިވެދިޔަ 6 މަސްތެރޭގައި ރާއްޖެއިން އެކްސްޕޯޓްކޮށްފައިވާ މަހާއި މަހުގެ އުފެއްދުންތަކުން 74 މިލިޔަން ޑޮލަރުގެ އާމްދަނީއެއް ރާއްޖެއަށް ލިބިފައި ވެއެވެ. މިދިޔަ އަހަރު ޖޫން މަހުގެ ނިޔަލަށް މަހާއި މަހުގެ އުފެއްދުންތައް އެކސްޕޯޓް ކޮށްގެން ލިބިފައިވަނީ 52 މިލިޔަން ޑޮލަރެވެ.އެހެންކަމުން މިއަހަރު މަހާއި މަހުގެ އުފެއްދުންތައް އެކްސްޕޯޓް ކޮސްގެން ލިބުނު އާމްދަނީ 43 އިންސައްތަ ވަނީ އިތުރު ވެފައެވެ.

އެމެއެމްއޭގެ ހިސާބުތަކުންދައްކާ ގޮތުން ވޭތިވެދިޔަ 6 މަސްތެރޭގައި ރާއްޖެއިން ވަނީ  44,877.7 މެޓްރިކް ޓަނުގެ މަސް އެކްސްޕޯޓް ކޮށްފަ އެވެ. މިދިޔަ އަހަރު މިމުއްދަތުގައި އެކްސްޕޯޓުކޮށްފައިވަނީ 26,850.8 މެޓްރިކް ޓަނެވެ. އެހެންކަމުން މިއަހަރު ރާއްޖެއިން މަސް އެކްސްޕޯޓް ކުރި މިންވަރު  67 އިންސައްތަ ވަނީ އިތުރު ވެފައެވެ.

މަސް އެކްސްޕޯޓް ކޮށްގެން ލިބުނު އާމްދަނީ
ޖަނަވަރީ – 8.6 މިލިޔަން ޑޮލަރު
ފެބްރުއަރީ – 13.3 މިލިޔަން ޑޮލަރު
މާރިޗު – 12.4 މިލިޔަން ޑޮލަރު
އެޕްރީލް – 18.2 މިލިޔަން ޑޮލަރު
މެއި – 11.2 މިލިޔަން ޑޮލަރު
ޖޫން – 10.8 މިލިޔަން ޑޮލަރު

މިއަހަރު މިހާތަނަށް އެކްސްޕޯޓުކުރި މަހުގެ މިންވަރު
ޖަނަވަރީ – 5،710 މެޓްރިކް ޓަނު
ފެބްރުއަރީ – 8،511 މެޓްރިކް ޓަނު
މާރިޗު – 7،376 މެޓްރިކް ޓަނު
އެޕްރީލް – 9،700 މެޓްރިކް ޓަނު
މެއި – 7،500 މެޓްރިކް ޓަނު
ޖޫން – 6,026 މެޓްރިކް ޓަނު