އިންޑިއާގެ އެންމެ ބޮޑު ޕަބްލިކް-ޕްރައިވެޓް ޕާޓްނަރޝިޕް އެއަރޕޯޓްސް އޮޕަރޭޓަރ އަދި އަދާނީ އެންޓަރޕްރައިޒަސް ލިމިޓެޑްގެ ސަބްސިޑިއަރީއެއް ކަމަށްވާ އަދާނީ އެއަރޕޯޓް ހޯލްޑިންގްސް ލިމިޓެޑް (އޭ.އޭ.އެޗް.އެލް) އިން ވަނީ ދަތުރުވެރިންނަށް ލިބޭ އެއަރޕޯޓް ތަޖުރިބާ އިތުރަށް ހަރުދަނާކުރުމަށް، އާރޓިފިޝަލް އިންޓެލިޖެންސް (އޭ.އައި) ޓެކްނޮލޮޖީގެ އެހީގައި، އިންޓަރގްލޯބް އެންޓަރޕްރައިޒަސްގެ ކުންފުންޏެއް ކަމަށްވާ އޭއައިއޮންއޯއެސް އާއި ގުޅިގެން ސްޓްރެޓީޖިކް ހިއްސާދާރީއެއް އިއުލާންކޮށްފައެވެ. މިގުޅުމުގެ ދަށުން، އެކި ބަސްބަހުން ޚިދުމަތްދޭ، ގިނަ ވަސީލަތްތަކުން ގުޅޭ، އޭޖެންޓިކް އޭ.އައި ހައްލެއް ތަންފީޒުކުރެވޭނެއެވެ.

މި ގުޅުމުގެ މައިގަނޑު މަގުސަދަކީ އެއަރޕޯޓްތަކުގައި މިހާރު ދެމުން އަންނަ ޕެސެންޖަރ ހެލްޕް ޑެސްކްގެ ޚިދުމަތް އިތުރަށް ރަނގަޅުކޮށް، ދަތުރުވެރިންނަށް ފަސޭހަކޮށްދިނުމެވެ. އޭ.އޭ.އެޗް.އެލްގެ ޗީފް އެގްޒެކެޓިވް އޮފިސަރ އަރޫން ބަންސަލް ވިދާޅުވީ، އެ ކުންފުނީގެ އަމާޒަކީ "ދަތުރުފަތުރުގެ ކަންބޮޑުވުން ހިތްހަމަޖެހުމަށް ބަދަލުކޮށް، ޑިޖިޓަލް-ފަސްޓް އީޖާދީ ހައްލުތަކުގެ ތެރެއިން އެއަރޕޯޓް ތަޖުރިބާ އާލާކުރުން" ކަމަށެވެ. އަދި އޭނާ އިތުރަށް ވިދާޅުވީ، "އޭއައިއޮންއޯއެސް އާއި ގުޅިގެން މި ކުރެވޭ މަސައްކަތަކީ އަޅުގަނޑުމެންގެ އެއަރޕޯޓްތައް މެދުވެރިކޮށް ދަތުރުވެރިންނަށް ފަސޭހަ  ދަތުރުތަކެއް ފޯރުކޮށްދިނުމަށް އެޅުނު މުހިންމު ފިޔަވަޅެއް" ކަމަށެވެ.

ބަންސަލް ވިދާޅުވީ، އެ ކުންފުނީގެ އަމިއްލަ ޚިދުމަތްތައް ކަމަށްވާ އެވީއޯ ، އަދާނީ ވަންއެޕް ، އަދި އެއަރޕޯޓް-އިން-އަ-ބޮކްސް  އާއި އެކު، "ކުޅަދާނަކަން އިތުރުކޮށް، ހުރިހާ ފަރާތްތަކަށް ފުރުސަތު ދީ، އިންޑިއާގައި ޒަމާނީ، ދެމެހެއްޓެނިވި އަދި މުސްތަގުބަލަށް ތައްޔާރު އެއަރޕޯޓްތަކަށް އާ މިންގަނޑުތަކެއް ކަނޑައަޅާނެ ގުޅިފައިވާ ނިޒާމެއް" ބިނާކުރަމުން އަންނަ ކަމަށެވެ.

އޭ.އޭ.އެޗް.އެލް އިން ބުނި ގޮތުގައި، މި އާ ހައްލުގެ ސަބަބުން އަދާނީގެ ހުރިހާ އެއަރޕޯޓްތަކުންވެސް އެއްފަދަ ޚިދުމަތެއް ލިބޭނެއެވެ. އަދި މިހާތަނަށް ނުލިބޭ ފަދަ، ބަސްބަހުން ފަރުދީ އެހީތެރިކަމެއް ޕެސެންޖަރުންނަށް ލިބިގެންދާނެއެވެ. މި ގުޅުމުގެ ދަށުން، އޭއައިއޮންއޯއެސް އިން އެ ކުންފުނީގެ އަމިއްލަ އޭޖެންޓިކް އޭ.އައި ޕްލެޓްފޯމް ކަމަށްވާ "އިންޓެލިމޭޓް" ބޭނުންކޮށް، އަދާނީ އެއަރޕޯޓްތަކަށް ކަސްޓަމަރުންނާއި މުވައްޒަފުންނާ ގުޅޭނެ ގިނަ ވަސީލަތްތަކެއް (އަޑުން، ޗެޓުން، ވެބް އަދި މޯބައިލް) މެދުވެރިކޮށް އެމީހުން ބޭނުންވާ ބަހަކުން ޚިދުމަތް ދިނުމުގެ ފުރުސަތު ލިބިގެންދާނެއެވެ.

އޭއައިއޮންއޯއެސް ގެ ކޯ-ފައުންޑަރ އަދި ވައިސް ޗެއަރމަން ސީޕީ ގުރަނާނީ ވިދާޅުވީ، "އޭ.އޭ.އެޗް.އެލް އާއި އެކު މި ބަދަލުވާ ދަތުރަށް ފެށުމަށް އަޅުގަނޑުމެން ވަރަށް އުފާކުރާ ކަމަށެވެ. އަޅުގަނޑުމެންގެ ގުޅުމުން ދައްކުވައިދެނީ ފުރިހަމަ ކަސްޓަމަރ ތަޖުރިބާތަކެއް ފޯރުކޮށްދިނުމަށް ތަރައްގީވެފައިވާ ޓެކްނޮލޮޖީ ބޭނުންކުރުމަށް އަޅުގަނޑުމެންގެ މެދުގައި އޮތް އެއްވިސްނުން" ކަމަށެވެ.

އޭ.އައި އިން ހިންގާ މި ޕްލެޓްފޯމަކީ 24 ގަޑިއިރު ހަރަކާތްތެރިވާ ބުއްދިވެރި ކޮންސިއަރޖެއްގެ ގޮތުގައި މަސައްކަތްކުރާނެ އެއްޗެކެވެ. ދަތުރުވެރިންނަށް ފްލައިޓްގެ މައުލޫމާތު، ގޭޓްގެ މައުލޫމާތު، ލަގެޖްގެ ހާލަތު، މިސްރާބު އަދި އެއަރޕޯޓް ޚިދުމަތްތަކާ ބެހޭ މައުލޫމާތު ވަގުތުން، އިންގްލިޝް، ހިންދީ އަދި ސަރަހައްދީ ބަސްތައް ވެސް ހިމެނޭ ގޮތަށް ގިނަ ބަސްބަހުން ލިބިގެންދާނެއެވެ. ހުރިހާ ޗެނަލްތަކެއްގައި ގުޅުން އެއްކޮށްލުމުން، މި ނިޒާމުގެ ސަބަބުން އެއްފަދަ، މައުލޫމާތު ތަކާ ގުޅުން ހުރި ތަޖުރިބާތަކެއް ލިބި، ޕެސެންޖަރުންގެ ހިތްހަމަޖެހުން ވަރަށް ބޮޑަށް އިތުރުވެ، ޚިދުމަތް ދިނުމަށް ނަގާ ވަގުތު ކުރުވެގެންދާނެއެވެ.

މި އާ އޭ.އައި ނިޒާމުގެ މަގުސަދަކީ ކަސްޓަމަރ ތަޖުރިބާ ރަނގަޅުކޮށް، ސަޕޯޓް އޮޕަރޭޝަންތައް ހަރުދަނާކޮށް، އަދާނީގެ އޮޕަރޭޓްކުރާ އެއަރޕޯޓްތަކުގެ ތެރޭގައި ހުރިހާ ފަރާތްތަކަށް ފުރުސަތު ދިނުމެވެ. އަދާނީ އެއަރޕޯޓް ހޯލްޑިންގްސް ލިމިޓެޑް (އޭ.އޭ.އެޗް.އެލް) އަކީ އިންޑިއާގައި ޕަބްލިކް-ޕްރައިވެޓް ޕާޓްނަރޝިޕްގެ ދަށުން ހިންގާ އެއަރޕޯޓްތަކުގެ އެންމެ ބޮޑު އޮޕަރޭޓަރެވެ.

މުމްބާއީގެ އިތުރުން، އޭ.އޭ.އެޗް.އެލް އިން އިންޑިއާގެ ހަ އެހެން އެއަރޕޯޓެއް ހިންގައެވެ. އެއީ އަހްމަދާބާދު، ލަކްނޯ، މަންގަލޫރު، ޖައިޕޫރު، ގުވާހާޓީ އަދި ތިރުވަނަންތަޕޫރަމް އެވެ. މީގެ އިތުރުން، މުމްބާއީގައި ހުންނަ ޗަތުރަޕަތީ ޝިވާޖީ މަހާރާޖް އިންޓަރނޭޝަނަލް އެއަރޕޯޓްވެސް އޭ.އޭ.އެޗް.އެލް އިން ހިންގާއިރު، ނަވީ މުމްބާއީ އިންޓަރނޭޝަނަލް އެއަރޕޯޓް ހިންގުމަށް އަންނަނީ ތައްޔާރުވަމުންނެވެ.

ޓެކްނޮލޮޖީގެ މި އައު ބަދަލަކީ އޭ.އޭ.އެޗް.އެލްގެ ފުޅާ ޑިޖިޓަލް ޓްރާންސްފޮމޭޝަން ސްޓްރެޓީޖީގެ މުހިންމު ބައެކެވެ. މީގެ މަގުސަދަކީ އެ ކުންފުނީގެ އެއަރޕޯޓްތަކުން ދަތުރުވެރިންނަށް ލިބޭ ތަޖުރިބާ އާލާކޮށް، އޮޕަރޭޝަނަލް ކާމިޔާބީގެ އާ ގްލޯބަލް މިންގަނޑުތަކެއް ކަނޑައެޅުމެވެ.