ދުނިޔޭގެ މަޝްހޫރު ކުންފުނި ޔުނިލީވާ އިން، ބެން އެންޑް ޖެރީސް ބްރޭންޑުގެ އައު އުފެއްދުމެއް ކަމަށްވާ "ކުކީ ޑޯ އައިސްކްރީމް ސޭންޑްވިޗް" ބާޒާރަށް ނެރުމަށް ތައްޔާރުވެއްޖެއެވެ.
2026 ވަނަ އަހަރުގެ ޖެނުއަރީ މަހުން ފެށިގެން ކޮންސޯޓް ފްރޯޒަން ފުޑްސް މެދުވެރިކޮށް ފިހާރަތަކަށް ސަޕްލައިކުރަން ފަށާ މި އައު އުފެއްދުމަކީ، ބެން އެންޑް ޖެރީސްގެ އުފެއްދުންތައް ތަފާތު ބާވަތްތަކަށް ފުޅާކުރުމުގެ ގޮތުން ނެރޭ އުފެއްދުމެކެވެ. މި އައިސްކްރީމް ސޭންޑްވިޗް ބާޒާރުން ލިބެން ހުންނާނީ ވަކިވަކިން ގަންނަން ލިބޭ ގޮތަށާއި، ހަތަރު ސޭންޑްވިޗް ހިމެނޭ ޕެކެޓްތަކެއްގެ ގޮތުގައެވެ.
މި އުފެއްދުމުގެ ހާއްސަ ސިފަތަކަށް ބަލާއިރު، މީގައި ހިމެނެނީ މަޑު ވެނީލާ އަދި ކޮކޯ ފްލޭވަރ އެކުލެވޭ ދެ ކުކީގެ ދެމެދުގައިވާ މީރު ވެނީލާ އައިސްކްރީމެވެ. އަދި މި އައިސްކްރީމްގެ ތެރޭގައި ބެން އެންޑް ޖެރީސްގެ ސިގްނޭޗަރ "ކުކީ ޑޯ" ގެ ގިނަ އެތިކޮޅުތަކެއް ހިމެނިފައިވެއެވެ.
ޔުނިލީވާ އިން ހާމަކޮށްފައިވާ ގޮތުގައި، މި އައު އުފެއްދުމުގައި ބޭނުންކޮށްފައިވަނީ އެ ކުންފުނީގެ އެންމެ މަގުބޫލު އަދި އެންމެ ގިނައިން ވިކޭ "ކުކީ ޑޯ" ފްލޭވަރއެވެ. މިއީ އެކި ގަޑިތަކުގައާއި ސްނެކެއްގެ ގޮތުގައި ބަނޑުހައިހޫނުކަން ފިލުވުމަށް އައިސްކްރީމް ބޭނުންކުރާ މިންވަރު އިތުރުވަމުންދާތީ، ކަސްޓަމަރުންގެ އެ ބޭނުންތަކަށް އަމާޒުކޮށްގެން ބާޒާރަށް ނެރޭ އުފެއްދުމެކެވެ.
މި އައިސްކްރީމް ސޭންޑްވިޗެއް ވަކިން ގަންނަން ލިބޭނެ އަގަކީ 2.50 ޕައުންޑެވެ. ކޮންސޯޓް ފްރޯޒަން ފުޑްސް މެދުވެރިކޮށް މި އުފެއްދުން ބާޒާރަށް ނެރުމާއެކު، އާންމު ފިހާރަތަކުން މީގެ ސިންގަލް އަދި ފޯ-ޕެކް ވެރިއަންޓްތައް ލިބެން ހުންނާނެއެވެ.
