ޖަޕާނުގެ މަޝްހޫރު އަދި އަގުބޮޑު "ވައިޓް ޖުވެލް" ސްޓްރޯބެރީއަށް ފަހު، މިހާރު މުޅި ދުނިޔޭގެ ސަމާލުކަން ހުއްޓިފައިވަނީ ޗައިނާއިން އަލަށް އުފައްދާފައިވާ "ބްލެކް ޕާލް" ސްޓްރޯބެރީ އަށެވެ. ގަދަ ދަނބު ނުވަތަ ކަޅު ކުލައަކަށް ހުންނަ މި ސްޓްރޯބެރީ އަކީ އޭގެ ތަފާތު ބައްޓަމާއި، މީރު ރަހަ އާއި، ފޮނިކަމުގެ ސަބަބުން މޭވާގެ ބާޒާރުގައި މިހާރު އެންމެ ހިނގާ އެއް ބާވަތެވެ.

ބޭރުގެ މީޑިއާތަކުން ރިޕޯޓްކުރާ ގޮތުގައި، ތަފާތު ރަހަތަކަށް ލޯބިކުރާ ފަރާތްތަކުން މި ސްޓްރޯބެރީ ޕައުންޑެއް ގަތުމަށް 45 ޑޮލަރު (ގާތްގަނޑަކަށް 700 އަށްވުރެ ގިނަ ރުފިޔާ) ހޭދަކުރެއެވެ. މިއީ އާދައިގެ ސްޓްރޯބެރީއާ އަޅާބަލާއިރު ވަރަށް ބޮޑު އަގަކަށް ވާތީ، ގިނަ ބަޔަކު މި މޭވާ ސިފަކުރަނީ "ހާމީސް" ފަދަ ލަގްޒަރީ ބްރޭންޑެއްގެ ގޮތުގައެވެ.

ޗައިނާގެ ހަންގްޒޫ އަދި ކިންގްޑާއޯގެ ދަނޑުވެރިން ބުނާ ގޮތުގައި، ބްލެކް ޕާލް ސްޓްރޯބެރީ ހެއްދުމަކީ ވަރަށް އުނދަގޫ އަދި ބުރަ މަސައްކަތެކެވެ. އަދި އާދައިގެ ސްޓްރޯބެރީއާ އަޅާބަލާއިރު މި ބާވަތުން ލިބޭ މިންވަރު (ޔީލްޑް) ވަރަށް މަދެވެ. މިއީ މީގެ އަގު މިހާ ބޮޑުވާން ދިމާވާ މައިގަނޑު ސަބަބެވެ. މިހާރު ޗައިނާގައި މި ސްޓްރޯބެރީއަށް އޮތް ޑިމާންޑް އިންތިހާއަށް އުފުލިފައިވީ ނަމަވެސް، ހެއްދުމުގެ އުނދަގޫކަމުން ގިނަ ދަނޑުވެރިން މި ބާވަތް ހެއްދުމަށް ފަސްޖެހެއެވެ.

ޗައިނާ އެގްރިކަލްޗަރަލް ޔުނިވަރސިޓީގެ ކޮލެޖް އޮފް ހޯޓިކަލްޗާގެ ޕްރޮފެސަރެއް ކަމަށްވާ ލީ ބިންގްބިންގް ވިދާޅުވި ގޮތުގައި، މި ސްޓްރޯބެރީގެ ކުލަ ކަޅު ކުލައަކަށް ހުންނަނީ އޭގައި އެކުލެވޭ "އެންތޯސިއަނިން"ގެ މިންވަރު މަތިވުމުންނެވެ. މިއީ ބްލޫ ބެރީ ފަދަ މޭވާތަކުން ވެސް ފެންނަ، ސިއްހަތަށް ފައިދާ ހުރި ވަރުގަދަ ގުދުރަތީ އެންޓިއޮކްސިޑެންޓެކެވެ.

ސޯޝަލް މީޑިއާގައި މި މޭވާ ވައިރަލްވެ، މިހާރު މިއީ "ޓްރެންޑަކަށް" ވެފައިވީ ނަމަވެސް، މީގެ ރަހަ ބެލި ފަރާތްތަކުން ބުނާ ގޮތުގައި މީގެ ރަހަ އަކީ ހަގީގަތުގައި ވެސް ވަރަށް ފުރިހަމަ ރަހައެކެވެ. ތަޖުރިބާކާރުން ލަފާކުރާ ގޮތުގައި، ދަނޑުވެރިކަމުގައި ދިމާވާ ގޮންޖެހުންތަކުން އަރައިގަނެވިއްޖެނަމަ، ކުރިމަގުގައި ޗައިނާގެ އިތުރުން ދުނިޔޭގެ އެހެން ގައުމުތަކުގެ ބާޒާރުތަކުން ވެސް މި އަގުބޮޑު ސްޓްރޯބެރީ ފެނުމުގެ ފުރުސަތު އެބައޮތެވެ.