ޓެލެގްރާމްގެ ބާނީ ޕަވެލް ޑުރޯވް، މަޝްހޫރު މެސެޖިންގ އެޕްލިކޭޝަން "ވަޓްސްއަޕް" އަށް ވަރަށް ބޮޑަށް ފާޑުވިދާޅުވެ، އެއީ ކަސްޓަމަރުންނަށް އޮޅުވާލުމަށް ހިންގާ "ތާރީޚީ ބޮޑު ޖަރީމާއެއް" ކަމަށް ސިފަކުރައްވައިފިއެވެ.
ޑުރޯވް ފާހަގަކުރެއްވި ގޮތުގައި، ވަޓްސްއަޕުން އިޝްތިހާރުކުރާ "އެންޑް-ޓު-އެންޑް އެންކްރިޕްޝަން" އަކީ ބޭނުންކުރާ މީހުންގެ ޕްރައިވެސީ ފުރިހަމައަށް ރައްކާތެރިކޮށްދޭ އެއްޗެއް ނޫނެވެ. އޭނާ ވިދާޅުވީ ވަޓްސްއަޕް މެސެޖުތަކުގެ ގާތްގަނޑަކަށް 95 އިންސައްތަ ރައްކާކުރެވެނީ އެޕަލް އަދި ގޫގުލްގެ ކްލައުޑް ސަރވިސްތަކުގައި "ޕްލެއިން-ޓެކްސްޓް" ބެކަޕްގެ ގޮތުގައެވެ. މީގެ މާނައަކީ އެ މެސެޖުތަކަކީ އެންކްރިޕްޓް ކުރެވިފައިވާ މެސެޖުތަކެއް ނޫން ކަމެވެ.
ވަޓްސްއަޕްގައި އެންކްރިޕްޓް ކުރެވިފައިވާ ބެކަޕް ހެދުމަކީ އިޚުތިޔާރީ ކަމަކަށް ވެފައި، ގިނަ މީހުން އެކަން ނުކުރާތީ، ސަރުކާރުތަކަށާއި، ކްލައުޑް ޚިދުމަތްދޭ ފަރާތްތަކަށް އަދި ހެކަރުންނަށް އެ މެސެޖުތައް ކިޔުމުގެ ފުރުސަތު އޮންނަކަމަށް ޑުރޯވް އިންޒާރު ދެއްވިއެވެ. މީގެ އިތުރުން، އަމިއްލަ މީހާ ބެކަޕް ރައްކާތެރިކުރި ނަމަވެސް، މެސެޖު ފޮނުވާ އަނެއް މީހާގެ ފޯނުން އެ މެސެޖުތައް ލީކުވުމުގެ ބިރު އޮންނަކަން އޭނާ ފާހަގަކުރެއްވިއެވެ.
ޑުރޯވް އިތުރަށް ތުހުމަތުކުރެއްވި ގޮތުގައި، އެޕަލް އަދި ގޫގުލްއިން ކޮންމެ އަހަރަކު އެތައް ހާސް ފަހަރަކު ވަޓްސްއަޕް ބެކަޕް ޑޭޓާ ތިންވަނަ ފަރާތްތަކާ ހިއްސާކުރެއެވެ. ނަމަވެސް ޓެލެގްރާމްގެ ތާރީޚުގައި މިހާތަނަށް އެއްވެސް މީހެއްގެ އަމިއްލަ މެސެޖެއް އެއްވެސް ފަރާތަކަށް ހާމަކޮށްފައި ނުވާނެ ކަމަށް އޭނާ ވިދާޅުވިއެވެ.
މި މައްސަލައިގައި ދުނިޔޭގެ އެންމެ މުއްސަނދި މަހުޖަނު އީލޮން މަސްކް ވެސް ވަނީ ޑުރޯވްގެ ވާހަކަތަކަށް ތާއީދުކޮށް، ވަޓްސްއަޕަށް އިތުބާރު ނުކުރާކަން ހާމަކޮށްފައެވެ. އަދި "އިލެކްޓްރޯނިކް ފްރޮންޓިއަރ ފައުންޑޭޝަން" ފަދަ ޖަމްއިއްޔާތަކުން ވެސް ވަނީ ވަޓްސްއަޕްގެ ބެކަޕްތަކުގައި ހުރި ނުރައްކާތަކާ މެދު ކަންބޮޑުވުން ފާޅުކޮށްފައެވެ.
މި ތުހުމަތުތަކާ ގުޅިގެން ވަޓްސްއަޕްގެ ބެލެނިވެރި ކުންފުނި "މެޓާ" އިން ބުނެފައިވަނީ އެ ވާހަކަތަކަކީ ދޮގު ވާހަކަތަކެއް ކަމަށެވެ. އަދި ވަޓްސްއަޕް ބޭނުންކުރަނީ އެންމެ ވަރުގަދަ ސިގްނަލް ޕްރޮޓޮކޯލް ކަމަށާއި، މެސެޖުތައް ކިޔޭނީ ހަމައެކަނި ފޮނުވާ މީހާއަށާއި ލިބޭ މީހާއަށް އެކަނި ކަމަށް އެ ކުންފުނިން ތަކުރާރުކޮށް ބުނަމުންދެއެވެ.
