ދެހާސް ދިހަ ވަނަ އަހަރު ޝިމާދު އިބްރާހީމް، ސަރުކާރުގެ ވިޔަފާރި ކުންފުނީގެ 50 ހިއްސާ ގަނެގެން ފެށި ދަތުރު، މިއަދު މިވަނީ މުޅިން އެހެން ހިސާބަކަށް ގޮސްފައެވެ. ކާމިޔާބުގެ ހެޔޮ މަންޒިލަކަށް ވާސިލްވެފައެވެ. ވިޔަފާރި އަށާއި ކޯޕަރޭޓް ސްޓްރެޓެޖީއަށް ލޯބިކުރާ މީހަކަށް އެއީ އޭރު ވަރަށް ބޮޑު ކަމަކަށް ނޫނީ ނުވާނެއެވެ. އޭގެ 13 އަހަރު ފަހުން، ޝިމާދު މިއަދު އެހުރީ އެސްޓީއޯގެ އެމްޑީ އަދި ސީއީއޯގެ މަގާމުގައެވެ. އޭނާގެ ބެލުމުގެ ދަށުން އެސްޓީއޯ އާއި އެ ކުންފުނީގެ ދަށުން ހިންގާ އެހެން ކުންފުނިތައް ދަނީ ސަޅި ކާމިޔާބީތަކެއް ހޯދަމުންނެވެ.
ރާއްޖޭގެ މީޑިއާއަކަށް ދިން އިންޓަވިއުއެއްގަ ޝިމާދު އޭނާގެ މާޒީ ހަނދާންކުރީ މިފަދައިންނެވެ؛
"އަހަރީ އާންމު ޖަލްސާތަކަށް ގޮސް، ކުންފުނިތަކުގެ ރިޕޯޓްތައް ދިރާސާކުރުމަކީ އަބަދުވެސް ކުރާހިތްވާ ކަމެއް. 2010 ގައި 50 ހިއްސާ ގަނެގެން އެސްޓީއޯއާ ގުޅުނުއިރު، އެއީ އަމިއްލަ މީހަކަށް ބަލާފަ ވަރަށް ބޮޑު އެއްޗެއް،" ޝިމާދު ވިދާޅުވިއެވެ.
ޝިމާދު އެސްޓީއޯއާ އޮތް ގުޅުން ބަދަހިވީ 2019ގައި ބޯޑު މެންބަރަކަށް އައްޔަންވުމުންނެވެ. އެއީ އޭނާ އެ މަގާމުގައި 2023 އާ ހަމައަށް ހުރި ދުވަސްވަރުއެވެ. އަދި ޑިސެމްބަރު 2023ގައި ކުންފުނީގެ އެމްޑީގެ މަގާމާ ހަވާލުވުން ވީ އޭނާގެ ކެރިއަރުގެ އެންމެ ބޮޑު ބަދަލަށެވެ. އެއާއެކު އޭނާ މި ހަވާލުވީ ރާއްޖޭގެ އިޤްތިސާދުގެ އެންމެ މުހިންމު އެއް ކުންފުނީގެ ހުންގާނާއެވެ.
ޝިމާދު ވިދާޅުވިގޮތުން އެސްޓީއޯގެ އެންމެ ބޮޑު ބޭނުމަކީ ރާއްޖެއަށް ބޭނުންވާ އަސާސީ މުދާ ހެޔޮ އަގުގަ، އިތުބާރާއެކު ލިބޭނެ ގޮތް ހެދުމެވެ. ގައުމުގެ ސަޕްލައި ޗެއިން ހިފަހައްޓަން ކުރާ މަސައްކަތް ފާހަގަކުރަމުން އޭނާ ބުންޏެވެ؛
"އަހަރެމެންނަށް މިކަން ވަރަށް ކާމިޔާބު ކަމާއެކު އެބަ ކުރެވޭ،"
އޭނާގެ ލީޑަޝިޕްގައި އެސްޓީއޯއިން ދަނީ ވިޔަފާރި އެކި ދާއިރާތަކަށް ފުޅާކުރަމުންނެވެ. އޭގެ ތެރޭގަ:
- ނޮދަން ބަންކަރިންގ ސާވިސަސް: ރާއްޖޭގެ އުތުރުގަ ތެލުގެ ހިދުމަތް ފުޅާކޮށް، ކަނޑުދަތުރުފަތުރަށް އެހީވުން.
- އެގްރިކަލްޗަރަލް އިކޮނޮމިކް ޒޯން: މާލެ ސަރަހައްދުގަ ހާއްސަ ޒޯނެއް ހަދައިގެން ރާއްޖޭގެ ދަނޑުވެރިކަން ކުރިއެރުވުން.
- ރޯދަމަހު އަގު ހިފެހެއްޓުން: ކޮންމެ އަހަރަކުވެސް ކުރާހެން، ރޯދަމަހު މުދަލުގެ އަގުތައް ކޮންޓްރޯލްކޮށް ހެޔޮ އަގުގަ ތަކެތި ފޯރުކޮށްދިނުން.
- އަސާސީ ބައެއް ކާބޯތަކެތީގެ އަގު ކޮންޓްރޯލްކޮށް ހިފެހެއްޓުން
ކުރިމަގުގެ ތަސައްވުރު
ސަރުކާރު ހިއްސާވާ ރާއްޖޭގެ އެންމެ ބޮޑު ވިޔަފާރި ކުންފުނި ހިންގުމަކީ ފަސޭހަ ކަމެއް ނޫނެވެ. އެކި ދާއިރާތަކުގެ ސަބްސިޑިއަރީ ކުންފުނިތަކާއެކު، ޝިމާދު ވެފައިވަނީ ގައުމުގެ އެންމެ ނުފޫޒުގަދަ އެއް ސީއީއޯ އަށެވެ. އޭނާ ބޮޑަށް ވިސްނަނީ އާ އީޖާދުތަކަށާއި ދެމެހެއްޓެނިވި ގޮތެއްގައި ރައްޔިތުންނަށް ބޭނުންވާ ކަންކަން ކޮށްދިނުމެވެ.
އާދައިގެ ހިއްސާދާރެއްގެ ގޮތުން ޖަލްސާތަކަށް ގޮސް އުޅުނު މީހަކު، މިއަދު ގައުމުގެ އިގްތިސާދީ މައިނާރުގެ މުސްތަގުބަލު ބަދަލުކުރާ ސީއީއޯއަކަށް ވުން މިއީ ހަމަ ނަމޫނާއެކެވެ. ޝިމާދުގެ އިރުޝާދުގެ ދަށުން އެސްޓީއޯ ކުރިއަރަމުންދާއިރު، އެ ކުންފުނި އަބަދުވެސް ދެމިއޮންނާނީ ދިވެހި އިގްތިސާދުގެ ބިންގަލުގެ ގޮތުގައެވެ.
