ދިވެހިރާއްޖޭގެ ކަޅު ބާޒާރުގައި އެމެރިކާ ޑޮލަރުގެ އަގު އިންތިހާއަށް އުފުލި، ޑޮލަރެއްގެ އަގު 22.10 ރުފިޔާއަށް އަރައިފިއެވެ. މިއީ ފަހުގެ ތާރީޚެއްގައި ރާއްޖޭގައި ޑޮލަރުގެ އަގު މިހާ ބޮޑަށް އުފުލުނު ފުރަތަމަ ފަހަރެވެ.

ކަޅު ބާޒާރުގައި ޑޮލަރުގެ ވިޔަފާރިކުރާ ފަރާތްތަކާއި ސޯޝަލް މީޑިއާގެ އެކި ގްރޫޕްތަކުން ލިބޭ މައުލޫމާތަށް ބަލާއިރު، މިހާރު ޑޮލަރެއްގެ އަގު ހުރީ 22 ރުފިޔާއަށްވުރެ މަތީގައެވެ. މިއީ ރާއްޖޭގެ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައަޅާފައިވާ ރަސްމީ ރޭޓް ކަމަށްވާ 15.42 ރުފިޔާއާ އަޅާބަލާއިރު ވަރަށް ބޮޑު ތަފާތެކެވެ.

ފާއިތުވި ދެ އަހަރާ ބައިގެ ތަފާސްހިސާބުތަކަށް ބަލާއިރު، ޑޮލަރެއްގެ އަގު 17 ރުފިޔާއިން ފެށިގެން މެދުނުކެނޑި އުފުލެމުން ގޮސް، މިހާރު މިވަނީ ރެކޯޑް މިންވަރަކަށް މައްޗަށް ގޮސްފައެވެ. މި މައްސަލައާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ބުނަމުންދަނީ، ޑޮލަރުގެ އަގު މިހާ ބޮޑަށް އުފުލެން މެދުވެރިވީ ނިމިދިޔަ އެމްޑީޕީގެ ސަރުކާރުން ގެންގުޅުނު ނޭދެވޭ މާލީ ސިޔާސަތުތަކުގެ ސަބަބުން ކަމަށެވެ.

ސަރުކާރުން ފާހަގަކުރާ ގޮތުގައި، ކޮވިޑް-19 ގެ ދުވަސްވަރު އޭރުގެ ސަރުކާރުން އަށް ބިލިއަނަށްވުރެ ގިނަ ރުފިޔާ ޗާޕުކުރުމުގެ ސަބަބުން އިގްތިސާދުގައި ރުފިޔާ ގިނަވެ، އޭގެ ނޭދެވޭ އަސަރު ޑޮލަރުގެ މާކެޓަށް ވަނީ ކޮށްފައެވެ. ނަމަވެސް، މިހާތަނަށް ވެސް މި ސަރުކާރަށް ޑޮލަރުގެ އަގު ހިފެހެއްޓުމުގައި އެދެވޭ ނަތީޖާއެއް ނެރެވިފައެއް ނުވެއެވެ.

ކަޅު ބާޒާރުގައި ޑޮލަރުގެ އަގު އިންތިހާއަށް އުފުލުމުގެ ސަބަބުން، ރާއްޖެއަށް މުދާ އެތެރެކުރާ ވިޔަފާރިވެރިންނަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. މިކަމުގެ ސަބަބުން ބާޒާރުގައި ތަކެތީގެ އަގުތައް އުފުލި، އާންމު ރައްޔިތުންގެ ދިރިއުޅުމުގެ ހަރަދުތަކަށް ވަނީ ނުތަކާވަރުގެ ބޮޑު ބުރައެއް އުފުލަން ޖެހިފައެވެ.