ރާއްޖޭގެ އިޤުތިޞާދީ ދުވެލި އެތައް ގުނައަކަށް ފުޅާވަމުން އަންނައިރު، މާލޭ ވިޔަފާރި ބަނދަރަށް ދިމާވެފައިވާ ޖާގައިގެ ދަތިކަން ޙައްލުކުރުމަށްޓަކައި، ބަނދަރު ތިލަފުއްޓަށް ބަދަލުކުރުމުގެ ބޮޑު މަޝްރޫޢު ބާރަށް ކުރިއަށްދާ ކަމަށާއި، އަންނަ އަހަރުގެ ނޮވެމްބަރު މަހަށް ބަނދަރުގެ ޚިދުމަތުގެ 80 އިންސައްތަ ތިލަފުއްޓަށް ބަދަލުކުރުމަކީ ސަރުކާރުގެ ޢަމާޒެއް ކަމަށް ހާމަކޮށްފިއެވެ.

ރާއްޖޭގެ މައި ވިޔަފާރި ބަނދަރުގެ ޚިދުމަތް 1986 ވަނަ އަހަރު ފެށި ނަމަވެސް، މިއަދުވެސް މުދާ އަރުވާ ބާލަން ބޭނުންކުރަމުން ދަނީ 1997 ވަނަ އަހަރު ތަރައްޤީކުރި 100 މީޓަރުގެ ކީވޯލްއެވެ. ވޭތުވެދިޔަ 40 އަހަރުގެ ތެރޭގައި އެކަށީގެންވާ ކުރިއެރުމެއް ނުލިބި އޮތް މި ބަނދަރުގެ އެންމެ މަތީ ކެޕޭސިޓީއަށް 2015 ވަނަ އަހަރު އަރާފައިވާއިރު، މިހާރު ޚިދުމަތް ދެމުން އަންނަނީ ކެޕޭސިޓީއަށްވުރެ އެތައް ގުނައެއް އިތުރަށެވެ.

މި މައްސަލައަށް ދާއިމީ ޙައްލެއް ގެނައުމަށްޓަކައި ތިލަފުށީގައި ތަރައްޤީކުރާ އައު ވިޔަފާރި ބަނދަރަކީ، މިހާރު މާލޭގައި ހިންގާ 5 ހެކްޓަރުގެ ބަނދަރުގެ ބަދަލުގައި 60 ހެކްޓަރުގެ ބޮޑު ސަރަޙައްދެއްގައި ޤާއިމުކުރެވޭ ބަނދަރެކެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ބިއުރޯ މެނޭޖަރ ޙަސަން ޝިފާން ވިދާޅުވީ، ތިލަފުށީގެ ޑޮމެސްޓިކް ކީވޯލްގެ މަސައްކަތް މި އޮކްޓޯބަރު މަހުގެ ތެރޭގައި ނިމޭނެ ކަމަށާއި، އެއާއެކު މާލޭ ކޮމާޝަލް ހާބަރުގައި މިހާރު ދެމުންދާ ދޯނި ކްލިއަރެންސްގެ ޚިދުމަތްތައް ތިލަފުއްޓަށް ބަދަލުކުރެވި ބޮޑު ލުޔެއް ލިބިގެންދާނެ ކަމަށެވެ.

ބޭރުން މުދާ ގެންނަ ބޮޑެތި ބޯޓުފަހަރަށް ޚާއްޞަ އިންޓަރނޭޝަނަލް ކީވޯލްގެ މަސައްކަތް ޗައިނާގެ ހާބަރ އިންޖިނިއަރިން ކުންފުންޏާ ވަނީ ހަވާލުކޮށްފައެވެ. މި މަޝްރޫޢުގެ ދަށުން:

• 375 މީޓަރުގެ ދިގުމިނުގެ އަދި 14.6 މީޓަރުގެ ފުންމިން ހުންނަ ބަނދަރެއް ތަރައްޤީކުރެވޭނެއެވެ.
• މި ކީވޯލް 1.4 ކިލޯމީޓަރަށް އަދި ޑޮމެސްޓިކް ކީވޯލް އެއްކޮށް ނިމޭއިރު 2 ކިލޯމީޓަރަށް ބޮޑުކުރުމުގެ ޖާގަ އޮންނާނެއެވެ.
• ކޮންޓެއިނަރ ޔާރޑް ތަރައްޤީކުރުމުގެ އިތުރުން، ބޯޓުން މުދާ އަވަހަށް ބޭލުމަށް "ޝިޕް ޓު ޝޯރ" ޒަމާނީ ކެރޭންތައް ބެހެއްޓޭނެއެވެ.

ޝިފާން އިތުރަށް ފާހަގަކުރެއްވި ގޮތުގައި، މިހާރު ކުރިމަތިވާ ޖާގައިގެ ދަތިކަމުގެ ސަބަބުން ޕީކް ދުވަސްވަރު ބޯޓަކުން މުދާ ހުސްކުރަން ހަފުތާއެއްހާ ދުވަސް ހޭދަވި ނަމަވެސް، އައު ބަނދަރާއެކު އެއްފަހަރާ ދެ ބޯޓަށް ޚިދުމަތް ދެވި، މަސައްކަތުގެ ސްޕީޑް އިންތިހާއަށް އަވަސްވެގެންދާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ، ތިލަފުށީގައި ތަރައްޤީކުރާ އައު ވިޔަފާރި ބަނދަރު ވެގެންދާނީ އެންމެ ޒަމާނީ ފެންވަރުގެ (ސްޓޭޓް އޮފް ދި އާރޓް) ބަނދަރަކަށް ކަމަށެވެ. އަދި ޕޯޓާ ގުޅޭ ބައެއް މުހިންމު ޚިދުމަތްތައް މާލޭ އިންޑަސްޓްރިއަލް ޒޯނުގައިވެސް ޤާއިމުކުރެވިގެންދާނެއެވެ. މި މަޝްރޫޢު ފުރިހަމަވުމަކީ ރާއްޖޭގެ މުޅި އިޤްތިޞާދަށާއި ވިޔަފާރީގެ ވިއުގައަށް އިންޤިލާބީ ބޮޑު ކުރިއެރުމެއް ގެނެސްދޭނެ ކަމެކެވެ.