އުރީދޫ މޯލްޑިވްސްގެ ބްރޯޑްބޭންޑް އިންޓަނެޓް ޚިދުމަތް ކަމަށްވާ ސުޕަނެޓްގެ 40 އެމްބީޕީއެސް ނުވަތަ އެއަށްވުރެ މަތީ އަންލިމިޓެޑް ޕެކޭޖެއް ނަގައިގެން "ސްމާޓާ" ހޯމް ޑިވައިސްތަކެއް ހޯދުމުގެ ފުރުސަތު އެ ކުންފުނިން އިތުރުކޮށްފިއެވެ.

މިމަހުގެ ކުރީކޮޅު ފެށި މި ޕްރޮމޯޝަނަކީ ވަކި މުއްދަތަކަށް ކުރިއަށްގެންދާ "ޓައިމް-ލިމިޓެޑް" ހަރަކާތެކެވެ. އުރީދޫން މިއަދު ބުނީ، މި ޕްރޮމޯޝަންގެ ދަށުން ސުޕަނެޓްގެ އަންލިމިޓެޑް ޕެކޭޖުތަކުގެ ތެރެއިން 40 އެމްބީޕީއެސް ނުވަތަ އެއަށްވުރެ މަތީ ޕެކޭޖުތައް ނަގާ ކަސްޓަމަރުންނަށް އީޒެޑްވިޒް ބްރޭންޑުގެ ސްމާޓް ސެކިއުރިޓީ ޑިވައިސްތައް ހިލޭ ލިބޭނެ ކަމަށެވެ.

އެގޮތުން، ސުޕަނެޓް އަންލިމިޓެޑްގެ 40 އެމްބީޕީއެސްގެ ޕެކޭޖު ނަގާ ކަސްޓަމަރުންނަށް ހިލޭ އީޒެޑްވިޒް ކެމެރާއެއް ލިބޭނެއެވެ. އަދި 50 އެމްބީޕީއެސް ނުވަތަ އެއަށްވުރެ މަތީ ޕެކޭޖުތައް ނަގާ ކަސްޓަމަރުންނަށް އީޒެޑްވިޒް ބްރޭންޑުގެ ކެމެރާއެއްގެ އިތުރުން ކްލައުޑް ސްޓޯރޭޖް ވެސް ހިލޭ ލިބޭނެ ކަމަށް އުރީދޫން މައުލޫމާތު ދެއެވެ.

އުރީދޫން ބުނި ގޮތުގައި، މި ސްމާޓް ހޯމް ޓެކްނޮލޮޖީގެ އެހީގައި ކަސްޓަމަރުން ގޭގައި ނޫޅޭ ވަގުތުތަކުގައި ވެސް، ދުރުގައި ތިބެގެން ގޭގެ ކަންކަން ހިނގަމުންދާ ގޮތް ފަސޭހަކަމާއެކު ބަލާލެވޭނެއެވެ. މިއީ ކަސްޓަމަރުންގެ ރައްކާތެރިކަމާއި ފަސޭހައަށް އިސްކަންދީގެން ތައާރަފްކުރި ޚިދުމަތެކެވެ.

އުރީދޫން "ސްމާޓާ ހޯމް އިނީޝިއޭޓިވް" ރަސްމީކޮށް ތައާރަފްކުރީ މިއަހަރުގެ އޭޕްރިލް މަހުގެ 20 ވަނަ ދުވަހުއެވެ. އެ އިނީޝިއޭޓިވްގެ ދަށުން، ކޮންމެ ސުޕަނެޓް ޕެކޭޖަކާއެކު ސެކިއުރިޓީ ކެމެރާއާއި، ސްމާޓް ޑޯބެލް އަދި ކްލައުޑް ސްޓޯރެޖް ހިމެނޭހެން ޒަރޫރީ ސްމާޓް ހޯމް ޑިވައިސްތައް ބަންޑަލްކޮށްގެން ނެގުމުގެ ފުރުސަތު އޭރުވެސް ވަނީ ހުޅުވާލާފައެވެ.

މިހާރު ކުރިއަށްދާ ޕްރޮމޯޝަން ނިމޭނެ ވަކި ތާރީޚެއް އުރީދޫން އަދި ހާމަކޮށްފައެއް ނުވެއެވެ. އެހެންކަމުން، މިއީ އިންޓަނެޓްގެ ޚިދުމަތާއެކު ގޭގެ ސެކިއުރިޓީ ވަރުގަދަކުރަން ބޭނުންވާ ފަރާތްތަކަށް ލިބިގެންދާ ރަނގަޅު ފުރުސަތެކެވެ.