އެމެރިކާގެ ރައީސް ޑޮނަލްޑް ޓްރަމްޕް، ވެނެޒުއޭލާގެ ތެލުގެ ދާއިރާ އެމެރިކާގެ ބާރުގެ ދަށަށް ގެނައުމަށް ވެވުނު އެއްބަސްވުމަކީ "ތާރީޚުގައި ވެވުނު އެންމެ ބޮޑު އެއްބަސްވުން" ކަމަށް ސިފަކުރައްވާފައިވާއިރު، މި އެއްބަސްވުމުގެ އެންމެ އިސް ސަޚްޞިއްޔަތަކަށް ވެފައިވަނީ ގިނަ ތުހުމަތުތަކެއް އަމާޒުވެފައިވާ ވެނެޒުއޭލާގެ މަހުޖަނު އެލެހަންދްރޯ ބެޓަންކޯޓް ލޯޕޭޒް އެވެ.

ބާބަޑޯސްގައި ރަޖިސްޓްރީ ކޮށްފައިވާ "ނޯތު އެމެރިކަން ބްލޫ އެނާޖީ ޕާޓްނާސް" (ނަބެޕް) ނަމަކަށް ކިޔާ ކުންފުނިން ވެނެޒުއޭލާގެ 65 ބިލިއަން ފީފާގެ ސާފުނުކުރާ ތެޔޮ ހިމެނޭ 17 ތެޔޮ ވަޅެއްގެ އުފެއްދުންތެރިކަމާއި ވިޔަފާރި ބަލަހައްޓާނެއެވެ. ނަމަވެސް، މި ކުންފުނީގެ ވެރިޔާ، އުމުރުން 46 އަހަރުގެ ބެޓަންކޯޓަކީ ބައިނަލްއަޤްވާމީ ފަސް ޤައުމަކުން ތަޙުޤީޤުތައް ހިންގާފައިވާ މީހަކަށް ވުމުން، ގިނަ ބައެއްގެ މެދުގައި ވަނީ ސުވާލުތައް އުފެދިފައެވެ.

ކުރީގެ ރައީސް ހޫގޯ ޗާވޭޒްގެ ވެރިކަމުގައި ސަރުކާރުގެ ބޮޑެތި ކޮންޓްރެކްޓްތައް ހޯދައިގެން މަހުޖަނަކަށްވި "ބޮލިޗިކޯސް" ގެ ގޮތުގައި މަޝްހޫރުވި ޒުވާން ވިޔަފާރިވެރިންގެ ތެރޭގައި ހިމެނޭ ބެޓަންކޯޓްގެ މިލްކިއްޔާތު 2.6 ބިލިއަން ޑޮލަރަށް އަރައެވެ. އޭނާގެ ކުންފުނި ޑާވިކް އެސޯސިއޭޓްސް އަށް ބިޑުކުރުމެއް ނެތި 5 ބިލިއަން ޑޮލަރުގެ ކަރަންޓު މަޝްރޫޢުތައް ދީފައިވާއިރު، ޓްރާންސްޕޭރެންސީ ވެނެޒުއޭލާއިން ތުހުމަތުކުރާ ގޮތުގައި އެ މަޝްރޫޢުތަކުގެ އަގު ވަނީ ނުއަގުގައި ބޮޑުކޮށްފައެވެ. އަދި އޭނާގެ މައްޗަށް މަނީ ލޯންޑްރިންގ އާއި ކޮރަޕްޝަންގެ ތުހުމަތުތައް އެމެރިކާ، ސްޕެއިން އަދި ސްވިޒަލެންޑުން ކުރި ނަމަވެސް، އޭނާގެ މައްޗަށް އެއްވެސް ކުށެއް މިހާތަނަށް ސާބިތުވެފައެއް ނުވެއެވެ.

އެމެރިކާގެ ޚާރިޖީ ވަޒީރު މާކޯ ރޫބިއޯ ވިދާޅުވީ، ޓްރަމްޕްގެ ސަރުކާރުން ބެޓަންކޯޓް އިޚްތިޔާރު ކުރި މައިގަނޑު ސަބަބުތަކަކީ ތެޔޮ އުފެއްދުމުގެ ޤާބިލުކަން ހުރުމާއި، މިވަގުތު އޭނާގެ މައްޗަށް އެމެރިކާގައި އެއްވެސް ތަޙުޤީޤެއް ނެތުމުގެ އިތުރުން، ވެނެޒުއޭލާގެ އިދިކޮޅު ފަރާތްތަކަށް އޭނާ ކުރި ވަރުގަދަ ތާޢީދުގެ ސަބަބުން ކަމަށެވެ.

ރިޕޯޓްތައް ބުނާ ގޮތުގައި 2019 ގައި މަދޫރޯގެ ވެރިކަން ވައްޓާލަން އުޅުމުގެ ތެރޭގައި އެމެރިކާގެ އިސް އޮފިޝަލުންނާ ގާތް ގުޅުމެއް އުފެއްދި ބެޓަންކޯޓަކީ، މި އަހަރުގެ ޖެނުއަރީ 3 ގައި އެމެރިކާ ސިފައިން ހިންގި އޮޕަރޭޝަނެއްގައި ނިކޮލަސް މަދޫރޯ ހައްޔަރުކުރުމާ ގުޅިގެން، ވެނެޒުއޭލާގެ މިހާރުގެ ވަގުތީ ރައީސް ޑެލްސީ ރޮޑްރިގޭޒް އާއި އެމެރިކާއާ ދެމެދު މުޢާމަލާތްތައް ހަމަޖައްސައިދިން މައި މެދުވެރިޔާއެވެ.

ވެނެޒުއޭލާގެ ވަގުތީ ރައީސް ޑެލްސީ ރޮޑްރިގޭޒް ވެސް ވަނީ ބެޓަންކޯޓްގެ ދިފާޢުގައި ވާހަކަދައްކަވާފައެވެ. ތަޖުރިބާކާރުން ފާހަގަކުރާ ގޮތުގައި ބެޓަންކޯޓަކީ ސިޔާސީ ކޮންމެ ޙާލަތެއްގައިވެސް އަމިއްލަ މަންފާއާއި ފައިސާ ހޯދަންވީ މަގު ދެނެގަނެ، މައްސަލަތަކުން ސަލާމަތްވުމުގެ އާދަޔާޚިލާފު ހުނަރެއް ލިބިފައިވާ މީހެކެވެ.